Annika i Danmark: 23 März 2008

Ich ha mi scho lang uf d Oschtere do gfreut. Dr Grund: Es sin im Schnitt nur öbbe 10 Lüt wo do sin, dh mir hän 5 Täg s Huus ganz für uns. Das bedütet au, dass immer zwei Lüt e ganze Tag Kuchidienscht hän und drfür au sälber s Znacht dörfe bestimme und das denn koche. Au hän mr könne in dr Begtrups Stue ässe. Das isch sovil ich weiss dr ältischti Ruum in dr ganze Schuel und ligt grad näb dr Kuchi. Dört ässe ame nur die Agstellte und Familie (also nur wenn si Luscht hän). Isch uf jede Fall saumässig gmüetlich so zu 10. dört inne zässe und z pläuderle.

Geschter hän d Elfa und ich Kuchidienscht ka und mir hän d Latte also sehr sehr hoch gschrubt ;) Z'Obe hämmer Poulet-Streifli und ganz vil versch. Gmües brötlet und das denn zäme ine Topf keit, drzue hets Basmati Riis gä. Es het wirklig total guet gshcmeckt und alli sin begeischteret gsi :D
Denn hämmer no Cola und Fanta ikauft ka und hän das denn zum Ässe serviert (susch hämmer immer nur Wasser) UND denn hämmer zobe (hehe so geg die 10) no e Kueche gmacht (also sone fertig back dings us dr Tüte, abr er isch mega guet gsi!) und das denn au no im Fernsehruum uftischt, womer Film gluegt ka hän. Hihi jetz miemer wirklig sehr beliebt si *muaha*

Agfange hän die Oschtere eher unschön. Am Donnschtig bini zerscht bitz in d Turnhalle go trainiere, denn sin abr irgendwenn dr Jacob und sini Kinder ihneko go Fuessball spile, denn hani mi verzoge. Ufem Wäg noch use hani denn d Emilie und d Helene atroffe, wo zäme mit dr Tine und dr Anna e Bier-Picknick plant ka hän, will si no so vil Bier übrig ka hän. Ich ha denn scho innerlich dänkt: Ou nei Dankschön, ohni mi (schliesslich isches erscht am halb 2 am Nomitag gsi). Wies au het miesse ko hani mi denn glich beteiligt. Mir sin in Gang gsesse und hän öbbe am 2 mitem Bier-Verzehr agfange. Witrgange isches denn mit diverse Spili wie Bier Bowling und "Ich ha no nie" dr Brian (ein vo de Amis) isch denn au no drzue gstosse. Es isch eifach soooooooo luschtig gsi.

So geg die 5i isches uns denn z kalt worde und mir sin in dr Tine ihres Zimmer gange wos genau glich witr gange isch. Irgendwenn am 6i hämmer gmerkt: upps es gäbt jo zNacht. Denn simmer also mit unserem Bier und Wyy abe go ässe, die andere mien au dänkt ha mir sige nit ganz bache. Denn nochher simmer widr ufe und hän no komischi Spili gspil, wome ame eifach nüm ka vor lache. Dr Mitko und d Astrid sin teilwiis au no drbi gsi.
Irgendwenn um die 10/halb 11i hämmer gfunde mir gön mol abe in d Kuchi, dört hämmer no vom Schoggikueche vom Vortag gässe und umetanzt. Vo dr Kuchi hämmer denn natürlig no miesse e Souvenir mitnäh: Mir hän ein vo dene riisige Kochtöpf uf Rädli mit ufe gno (het natürlig ei Getschätter gä...macht jo abr nüt, isch jo susch kuum öbber do gsi).

Denn isches widr gange und mir hän no über alles mögliche gredet. Irgendwenn sin denn nur no ich, dr Brian, d Anna und d Tine übrig gsi, mir hän denn no sone komischs Zell-Spili gmacht und denn am 12i hämmer gfunde: Mir MIEN ins Bett. Alkohol hämmer fascht keine meh ka und vor allem simmer todmüed gsi vo dem lange Tag XD

Ich sag das jetz mol zur Beruhgig: Das isch s erschte Mol woni wirklig vil trunke ha (haha vom 14:00 bis 24:00) und i wirds so schnell au nüme mache, abr so eimol het das eifach brucht.

Dr nögscht Tag hani denn widr mit Drogeartige Stoff verbrocht...mit Hoorfärbemittel. D Elfa und ich sin dr ganz Tag bi ihre gsi und hän unseri Hoor neu coloriert. Ich ha eifach usgseh wie irgend e Schlachterin. Ha sone lockers, wisses Träger T-Shirt vo dr Elfa aka und denn isch natürlig alles rot gsi (und das rot het wirklig e Farb wie Bluet). Vo dem gits denn au no irgendwenn no Bilder.

Geschter hämmer ebe Kuchidienscht ka und ansunschte hani no bitz an mim Jupe fürs Tekstil und Design witrgnäit.

Jo und zobe simmer eigentlig jedes Mol am Film luege bis weiss nit wenn und denn schlofemer am nögschte Morge au entsprechend lang. Ich wird glaubs Müeh ha mi widr an Rhythmus z gwöhne.

Das wärs mol sowit zu unserne Oschtere.

Bis Bald

2655793