Nochere ganz wundervolle Wuche, miteme ganz wundervolle Bsuech (danke Philipp für die schöne Täg) hämmer uns denn au scho miesse parat mache für Berlin.

Am Sunntig, dr 13. isches am Morge am halb 8i losgange. Unsere Mega-Bus het uns abgholt. E willkommeni Abwächslig in dere 8/9-stündige Busfahrt isch sicherlich d Überfahrt mit dr Fähri vo Gedser noch Rostock gsi. Ich ha das Fähri-fahre wirklig vermisst :D

Öbbe am halb 5i simmer denn in Berlin vor unserem Hostel ako und hän unseri Zimmer bezoge. Die meischte hän 4er Zimmer ka, wo grad mol e Badzimmer mit WC ka hän. Haha, ich, d Elfa und d Karina hän e halbi Wohnig ka, mit Kuchi, Küelschrank, Badzimmer mit Duschi und Badwanne und Fernseh ;) es macht sich also doch irgendwenn bezahlt, wenn me nit als e ultimatics Party-und Suff-Meitli uffallt. Lang Zit hämmer abr nit ka, denn nochere halb Stund isch denn scho die erschti Geh-Tour ufem Plan gstande. Mir sin, alli todmüed natürlig, bitz in Berlin umetrottet und hän e paar Sächeli agluegt. Denn zobe, am Viertel vor 8i simmer nomol ufe kleini Tour gange, zum Richstag. Sin denn au in d Kupple, am Obe unter dr Wuche, nit in dr Hochsaison muess me ebe nit so lang astoh.

Am nögschte Tag hämmer denn dr Tag drmit verbrocht mit unserem coole Bus umezdüse und so zimlig alli Sehenswerte Stelle go z besichtige. Isch eigentlig no gmüetlich gsi und s Wätter isch am Afang super gsi. D Elfa und ich hän sogar unseri Mousse au Chocolat Torte könne im Sunneschiin amene Brunne gniesse :P

Am Obe simer z 6. (Ich, Elfa, Ewelina, Zuzanna, Astrid und Nanna) in e indischs Restaurant gange, wo grad am nögschte Ecke vom Hotel gläge isch. Es isch eifach genial gsi. Erschtens isch s Ässe eifach super gsi und zweitens hämmer zwei sehr agnähmi und witzigi Herre als Bedienig ka. Do ich die Einzig gsi bi, wo wirklig Dütsch ka (odr sich zumindescht getraut das au azwende, kleine Sitehiib an d Ewelina), hani könne Simultan übersetze. Isch au mol no luschtig gsi, dass alli vo mir abhängig gsi sin *muaha*. Uf jede Fall hämmer e genial luschtige Obe verbrocht, was nit z letscht an de Mega-Cocktails gläge isch, wos dört zur Happy Hour für nur 4 Euro gä het. Mir sin denn au prompt no vom Kellner iglade worde, ane Party wo am nögschte Obe stattgfunde hät (das "hät" losst jetz dr ufmerksami Leser druf schliesse, dass mr nit gange sin ;)).

Am Zischtig hets am Morge zerscht pbligatorischs Programm gä. 4 verschideni Toure sin abotte worde. Ich bi zersch ins Antike-Museum und denn in die alti Nationalgallerie gange. Am Nomitag hani mit dr Louise abgmacht ka, zum s X-tra-X (e extrem grosse Gothic Shop am Prenzlauer Berg) unsicher z mache. D Elfa und d Astrid sin au mitko und hän sich e Spass drus gmacht die überlschte Corsage azprobiere und sich denn z fötele. Ich has do bitz seriöser gno. Ha leider mis gwünschte Korsett nit in minere Grösse gfunde, drfür abr e verruckts Kleid, womer passt het wie agosse *freu*.
Nochher simmer no bitz ufem Prenzlauer Berg umespaziert und sin go käffele. Denn isches au scho widr heizue gange. (hehe hän ufem Heiwäg dr Ole atroffe, wo uns druf higwise het, dass mr eifach e bestimmti Tramlinie näme, anstatt müesam mit S-und denn U-Bahn zrugg zfahre)

Am Obe simmer irgendwie alli total erschöpft gsi, obwohl mr uns vorgno hän, so richtig ufe Putz zhaue. Sin licht müed ine italienischs Restaurant go ässe und nochher in sone Thai Restaurant, wos so geniali Schaukelstüehl usse ka het und ebefalls Cocktails für 4 Euro. Bi jo nit sone Fan vo Cocktails, abr für de Pris und die coole Farbe hani mr das nit könne entgo lo. Dört simmer denn uf zwei licht atrunkeni Dütschi gstosse, wo beidi in dr Armee sin und grad Ferie in Berlin mache. Eigentlig nit grad die agnähmschte Zitgnosse, abr zu uns sin si natürlig ganz lieb gsi ;) hän uns denn iglade am nögschte Tag widr zko, denn würdi si uns au d Cocktails zahle (hämmer denn abr au nit gmacht hihi). Nochher simmer denn witr in sone richtige dreckige Club gange go abfiire. Abr wie scho gseit, simmer eifach nit gnueg fit gsi, sin denn am 1 todmüed widr zrugg ins Hotel grad go schlofe.

Am Mittwuch isch nüt me obligatorisch gsi. Zerscht hämmer emol usgschlofe, sin go zMorge ässe und denn sin d Astrid, d Elfa und ich go lädele. D.h si sin go lädele, ich bi dumm drnäbe gstande odr bi mini eigene Wäg gange, schliesslig hani kei Gäld me könne usgäh :D Wo si sich grad e Tour de H&M gleischtet hän, bini bitz ufem Ku-Damm umespaziert und womr uns widr troffe hän, hän beidi sehr gheimnisvoll to. Plötzlich hän si sich umdreit und sich zwei übli Basecaps in schimmerndem rot und blau azoge, d Elfa het mir s gliche Modell in schwarz übergstreift (hehe si hän für mi extra no e schwarzes Exemplar kauft). Isch jo klar gsi, dass mr denn dr ganz Tag in dene Hüet umegloffe sin. E so isch denn au d Idee vo unserem Dreier-Gespann worde, us dem mir momentan grad e Musical mache (jaja, kein Witz): D Astrid isch d Liebi, ich dr Tod und d Elfa e Ängel XD
Z'Obe simmer (mit de Hüet) widr in das indische Restaurant gange, abr mir sin zue kaputt gsi ums nomol so luschtig zha. Sin denn bald mol zrugg ins Hotel go schlofe.

Am nögschte Tag simmer am 10i abgfahre und hän no e kleine Halt bim Olympiastadion gmacht, do's abr gregnet het, simmer im Bus blibe und dr Ole het uns über Lutsprecher bitz öbbis drüber verzellt.
Denn simmer witrgfahre und erscht uf dr Fähri widr uftaut (siehe Fotos!)

Das wärs au scho gsi vo unserer geniale Berlin Tour. Nochher hämmer no e gmüetlichs Freiwuchenend verbrocht und hüt het dr Ernscht vom Läbe (grööööhl) widr agfange ;).

Knus
Annikani


(Elfa, Ich, Ewelina, Astrid, dr Kellner Ronnie, si Cousin dr Achmed und d Nanna)


(Typisch: Ich studier d Karte und Astrid "hilft")


(s neue Dream Team)


(s neue Dream Team mit Hüet aka Love, Death and an Angel (wie s glichnamige Musical))


(ich vor dere..äääääää...weiss nüm...Nikolai-Kirche?)


(ich und d Ewelina in dene Schaukelstüehl)


(Having Fun on the Ship: Ich, Zuzanna, Ewelina, Elfa)


(Charlies Angels...oda sowas in der Art)