Tja im Moment isch bi uns dr Wurm din. Öbbe d Hälfti vo dr ganze Schuel isch gsundheitlich agschlage und e Viertel isch stark verkältet bis krank. Ich bi am Mäntig und Zischtig flach glege und ha die ganze Täg im Bett verbrocht. Hüt bini widr einigermasse fit, drfür ligt jetz d Lotte im Bett und isch krank ;) Das isch ahlt so, wenn me uf ängem Ruum zäme wohnt: me steckt sich au sehr schnell ah.

Jojo i hoff bis zum Wuchenend bini widr topfit ;)
Im Moment isches grad recht toll: Alli die wo Rytmisk Sammenspil hän, hän sit geschter bis morn nur Musik. Es sin e paar jungi Musikstudente do, wo sich am unterrichte üebe. Mir sin in drei Gruppe à 6 Lüt ufteilt worde und hän jetz die ganz Zit Musik bi dene. Isch no recht toll, sin tolli Lüt und s macht Spass. Am Donnschtig miemer denn au unsers glernte zum Beschte gä, denn gits nämlig e kleins Konzert.

Geschter hämmer endlich die neue Ganggruppebilder gmacht...wie gseit e dümmere Augeblick hätte si sich nit könne ussueche. Zum glück het mir das d Lotte rächtzitig gseit, denn hani mi no könne alege und mi widr einigermasse herstelle. Abr drei vo unserer Ganggruppe hän gfählt, will si entweder krank sin odr neume anders verpflichtet gsi sin. Und denn ebe wird me wohl einigi agschlageni Gsichter uf dene Föteli könne entdecke ;)
Drfür ischs Wetter fantastisch gsi. Jetz isch leider widr grau, abr me merkt, dass dr Früehlig kunnt; es wird tatsächlich immer wie wärmer.

Hüt gangi glaubs noch de Stunde no kurz go ikaufe und denn widr ab ins Bett um mi endgültig könne uszkuriere.

HATSCHI
Annika