Letschti Wuche hämmer e Thema-Wuche ka. S Thema isch gsi USA in de 20er, nebe diverse Vorträg und Film luege, hämmer uns au könne für Workshops amälde. Ich ha e Gospel Workshop gno und das isch aeifach genial gsi. Ha entdeckt dases mega Spass macht imene Chor z singe und wenns denn no Gospel isch fetzts erscht richtig. Ufgfüehrt hämmer denn das amene Gottesdienscht und ich und d Anette sin die einzige zwei Sopran Stimme gsi, ha am Obe dämentsprechend Halsweh ka. Noch uns sin denn die "Christliche Fraue im Kampf gegene Alkohol" ko und hän gege das dämonische Gsöff prediget. Es isch zum gröhle gsi.

Denn hämmer au no Unterricht im Charleston beko, was au no Erfahrig wert gsi isch (meh lernt jo schliesslig nie us). Am Zischtig (das het nüt mitem Thema ztue ka) simmer vo TV2 iglade worde als Publikum inere neue Quiz Show. Das isch au no spannend gsi, mol so hinter d Kuhlisse z güxle...abr au ganz schön verblödend. Mir hän natürlig immer miesse klatsche, johle, lächle und bi de no so blödschte Witz vom Moderator lache als sig Monty Python selbscht am Start.

Am Fritig hets denn e risigs Rollespil gä, wo imene illegale Nachtklub spilt. Dört hani leider nit könne drbi si, willi mi Wuchenend in dr Schwiz verbrocht ha ;)
Am Fritig am Nightwish Konzert (isch richtig geil gsi und jä die neu Sängerin hets zimlig druf!) und denn am Samschtig zObe bi dr Madame und mine über alles geliebte ehemolige Klassekamerade. Es isch scho no schreg gsi, eifach so übers Wuchenend hei zko und vo einere Welt ine total anderi Welt iztauche (jetz vor allem uf das Klasseträffe bezoge: Ich bi do halt vo ganz anderne Lüt umgäbe wo mit dene Lüt mit dene ich 3.5 Johr in dr Schuel verbrocht ha rein gar nüt ztue hän). Uf jede Fall isches e sehr schöne Ufenthalt worde und ich möcht mi an dere Stelle bi all dene bedanke woni gseh ha für ihres "Do-Si", bsunders toll isch natürlig gsi, widr mol richtig mitem Mami z schwätze und no töller, dasi dr Philipp widr gseh ha ;)

Woni zrugg ko bi isch denn alles e bitz andersch gsi, will 10 vo de alte Schüeler endgültig hei sin. Am Mäntig het mi denn dr Papi do bsuecht, wo in DK gsi isch zum mit sim Vater Geburtstag z fiire. Isch no gmüetlich gsi...UUUUND: mir rede jetz dänisch zäme, was natürlig e ganz neui Situation isch.

Am Mäntig zobe sin denn die neue Schüeler ko, unter anderem au mini neui Zimmergnossin und jetz kunnt dr Witz: Ich wohn widr mitere Lotte zäme. Nur isch si s zimlige Gegeteil vo minere alte Lotte, ich mach denn bi Glegeheit mol e Gegenüberstellig ;)
Was au no spannend isch: Ich bi jetz nüm die einzigi Uslanddänin. Es het jetz eini us Belgie und ein us Frankrich wo e dänischi Mueter hän und eini us England, wo wie ich e dänische Vater het, mit dem abr nit dänisch redet. Isch no luschtig z gseh, dases Lüt in dr genau gliche Situation git.

Geschter hämmer widr miesse Fächer wähle, ich ha gno:
A-Fag: Textil und Design
B-Fag: Islam und Europa (nit ganz freiwillig, schliesslig hani so öbbis ähnlichs intensivscht am Gym scho ka, abr es isch mehr sone Usschliess-Verfahre gsi)
C-Fag: Dänisch
D-Fag: Rytmisk Sammenspil 2 (wie hets au andersch könne si)
E-Fag: Schmuckwerkstatt

S Dänisch Fach macht mr ehrlich gseit e bitz Sorge: Jetz unterrichtets nur no d Ditte und mir sin mehr Lüt und stöhn uf no unterschidlichere Niveaus. Wird nit so eifach do alli zfride z stelle...

So das wärs dämfall mol vo de wichtigschte Neuigkeite.
Hüt zobe hets denn no e Hockey Turnier wo die einzelne Gäng gegenander aträtte...ich mach au mit. Ajo: mir hän jetz e 6. Gang: Lyngby Gang, wills soooooo vil neui Lüt gä het (minere Meinig noch vil zvil, mir sin jetz öbbe 80 Lüt, d Amerikaner nit mit igrächnet)

Ganz liebi Grüess und Knus
Annika

Tuet mr Leid, dases so lang gange isch, ha eifach kei Zit und Luscht gfunde zum do witrschribe.

Also vor 2 Wuche isch rückblickend nit sonderlich vil passiert. zumindescht nit unter dr wuche...s Highlight isch sicher s Konzert vom Robin Colvill gsi. Das isch e englische, in dr Szene zimlig bekannte, Pianist, wo uns d Ehr erwise het für uns z spile. Er isch sone richtige Gentleman gsi, mit Frack und Fliege, wie sichs ghört. Er het nit nur fantastisch gspilt sondern au immer widr Gschichtli zu de einzelne Stück und Komponischte verzellt. Ei Gschicht isch sini eigeni: er isch woner jung gsi isch bi dr Musikakademie in Salzburg ufgno worde, was einiges z bedüte het. Und wüsseder woner gwohnt het? Bzw wo d Studente vo dem Konservatorium traditionellerwiis wohne? In dem grosse Huus vo dr Familie Trapp usem Film "The Sound of Music"!!!!!! Das het uns (vor allem d Fraue ;) ) natürlig sehr beidruckt *g*

Am Fritig hämmer denn e kleins Rollespil ka. Es isch drum gange e typischs dänischs Konfirmationsfescht nochezspile, mit alle Skandäl und Pinlichkeite. Das isch denn au wirklig unglaublich luschtig worde. Ich ha d Fründin vomene Cousin vom Konfirmand gspilt, mir beidi sin Klei-Alkoholiker gsi und hän uns dementsprechend bsoffe dörfe verhalte.
Mit däm Tag isch denn au s erschte Modul z End gange.

Am Wuchenend bini denn bi dr Marianne undem Knud gsi, dass sin alti Fründe vo mim Papi. Das isch sehr gmüetlich gsi, het vor allem au guet do, mol neume andersch z schlofe, fernab vo allem Trubel.
Am Sunntig simmer denn no ihri älteri Tochter go bsueche wo kürzlich mit dr Familie noch Køge züglet isch. Isch luschtig gsi, si und ihri, inzwüsche sehr gwachsene Kinder, z gseh. Vor allem will mr dismol uf Dänisch hän könne plaudere und unseri schicksalhafte Männergschichte ustüschlet hän ;)


Mi Fründ ;) (Mitko), e schwule Modedesigner, wo grad erscht vo Paris zrugg ko isch (Uffe) und e ebefalls vil trinkende Unkel vom Konfirmand (Elisabeth)


D Elfa und dr Asbjørn als Buure-Ehepaar vo Jylland


D Mia als Pablo Julio Alejandro Garcia und sini (ganz eigeni und niemerds dörf si aluege) Frau (Tine)


Ich (ich gseh so unglücklich us will mi Charakter e Dauermotzerin gsi isch unds zimlig gstunke het an dem langwilige Konfirmationsfescht) und dr Marc (d Amerikaner hän au mitgmacht) als pensionierte Snob