Zwei kleini Neuigkeite, e zimlig Schlächtig und e Witzigi: Die schlächt natürlig zerscht.

Bi uns isch ibroche worde...also in dr Schuel, in dr Louise ihrem Zimmer. D Diebe hän dr Fenschterrahme mit irgendwelche Werkzüg durchtrennt und sin denn ins zimmer igstige, währenddem mir alli bim ZNachtässe gsi sin. Tüüre Familieschmuck (si entstammt schins useme Adelsgschlecht), Laptop (wo zum Glück kaputt gsi isch), iPod und Natel sin weg. Jetz goht natürlig bitz e mulmigs Gfühl ume in dr Schuel, denn das isch scho s zweite Mol, das isch nämlig scho letschte Herbscht passiert. Gross öbbis mache kame nit. Die mien wüsse, wenn mir am Nachtässe sin, irgendwie e unheimlichs Gfühl. Ich mach mr nit so Sorge um unsers Zimmer, mir sin zwor au im Erdgschoss, abr dr Louise ihres Zimmer isch s Hinterschte gsi, uf dr ganz andere, verlassene Site. Mir sin relativ im Zentrum, glaub nit dass sis do au woge.

Jetz zum Luschtige: Geschter isch Al Jazeera bi uns ko filme. Wo dr Jacob das bim Morgeässe akündigt het, hani zersch dänkt das sig e Witz, abr nochher hani denn bald die Fernsehlüt entdeckt. Si hän uns gfilmt bim Tischdecke (i ha grad Kuchidienscht ka), ässe, singe, in de Zimmer, dusse und uns bim abwäsche, halt alles mögliche, wo dr Alltag so zeigt. Al Jazeera will ebe e Sändig mache über Højskole in DK mache. Hehe jetz wärdemer bekannt in dr arabische Welt, juhui ;)