Geschter z'obe het s allwöchentliche Donnschtigskaffi stattgfunde. Es isch sooooo gröhlig gis, zumindescht am Afang: Öbbe am 8i hämmer uns im "Spisesal" versammlet und 6 Gruppe bildet à 8 Lüt odr so. Und denn hämme Geografie-Spil gmacht. Ich sag euch, das isch unglaublich luschtig gsi (ha sogar au bitz öbbis könne drzue bitrage). Vor allem wo e wiblichi, dänischi Nationalspilerin gsuecht gsi isch, do het nämlig niemerds wirklig e Ahnig gha und durum het me in jedere Rundi eifach mol irgend e Name gseit...tja dr Jacob (headmaster) het denn antürlig ame nochegfrogt in welere Disziplin die guete gnennte Fraue denn tätig sin. Dr Julian, ein wo bi mir in dr Gruppe gsi isch, het denn jedes mol gseit "fægtning", also fächte. Ich ha ame nüm könne, am Schluss hämmer denn au no dr Name Yksala erfunde, abr denn het dr Jacob scho gar niemerem me glaubt. Au luschtig isch gsi, wo e anderi Gruppe gseit het "Kim Ylde" (odr so), dä gits nämlig wirklig, DÄ! Es isch nämlig e Maa und die Gruppe het dänkt si könne alli drilege.
Odr au sehr luschtig isch gsi wos um e Kosmetik-Marke gange isch. Niemerd het mir glaubt dases "Bobbi Brown" git! und denn ehts gheisse "unerkennt" blaaaa. Do bini ufgstande und usem Saal grennt um mini Produkt zhole, abr si hen mi widr zrugggruefe, dr Jacob hets mr denn glaubt ;)

Jo und denn nochher het d Sigergruppe e Fläsche Wisswyy beko...und mir sin Siger gsi!!! Suppaaaaa

Denn nochher simmer in dene Gruppe blibe und hän Scharade gspilt. Isch super gsi für mi, will oft Dänischi Sprichwörter gfrogt gsi sin, abr ha glich bitz öbbis könne bitrage. Dr Rune (E Metal-Head mit alles keltische Knote als Ahänger ;) ) wo unsers Spil gleitet het, het mrs denn ame übersetzt, so zum Bispil "Det falder branden ned" ("Es fällt Holz hinunter") Tja das hani denn so guets goht demonschtriert...dumm nur, dass die andere us minere Gruppe das Sprichwort gar nit kennt hän ;)
Odr au super isch gsi, wo d Lise ka het "Michael Jackson seer Porno" ("Michael Jackson sieht einen Porno"), Michael Jackson hämmer usegfunde, "sehen" au...und denn het si e Porno demonstriert, also sehr ufmüpfigi Bewegige gmacht und was seit d Siri (e Norwegerin) "Michael Jackson seer et barn" (Michael Jackson sieht ein Kind", mir hän nüm könne vor lache. (Häns denn aber glich no usegfunde)

Odr denn ha ich ka "(Min) Mor er en kriminel" ((Mini) Mueter isch e Kriminelli)...ZEIGET MOL MUETER OHNI WORT!!! Ich ha irgendwie probiert mini Geburt darzstelle, in dem ich die ufmüpfige Bewegiege vo dr Lise übernoh ha und ufem Bode umegrollt bi :D Si häns nit checkt. Denn sin grad die beide Bulgar ko und denn hani mit Hilf vo dr Daniela zeigt, dass das mini Mueter söll si. Tja abr uf kriminell sin denn die andere leider nit ko, hän luter sache gseit wie "Dieb, Mörder, stähle, verhaftet, Aklagti..."
Isch wirklig sehr luschtig gsi.

Nochher isch denn trunke worde und e paar hän "Jeg har aldrig" gspilt ("Ich ha no nie...") tja, do hani widr miesse passe, erschtens willi nüt ztrinke ka ha (kei luscht) und zweitens willi nit so richtig mitko bi...abr shco nur s zuelose isch rächt intressant gsi.

Denn bini bald mol ins Zimmer, d Lotte isch au mitko und mir häns no sau lsuchtig gha, si het minere Üle (die vom philipp) unbedingt welle e Name gä...Si heisst jetz "Sleepy Head", will si so härzig unter minere Decki "gschlofe" het.

SO, fertig für hüt. Hüt obe gits denn no e Turnier, als Istig ins Tema-Weekend. Mir mien Döggele, Pingpong und Trivial Pursuit spile. Ich bi zäme mitem Anders, sone Chinese-Dän mit däm ich no nie gredet ha ;) wird sicher au no amüsant.

Schrib denn spöter mol no bitz öbbis über mini Fächer, die einzelne Lüt und s ässe ;)

Ajo und am 15.-17. Feb isch Bsuechswuchenend (für Fründe, nit Familie), also falls öbber Luscht het noch DK z ko (ka au länger als e Wuche si) nur zue, würd mi freue ;)

MVH
Annika