Sodele, nocheme intensive Reisetag, bini geschter do in Hillerød ako und sofort ischs losgange, Zimmer bezieh (wobi vo bezieh nit wirklig d Red ka si, willi denn sofort in "Opholdstuen" gange bi wome alli Neuakömmling herzlich begrüesst het), umesitze und schwätze (joooooou mit schwätze isch das sone Sach, hami meischtens mit Englisch duuregmurkst, abr trotzdem mis Dänisch zum beschte gä), Nachtässe, Informatione, Rundvisning usw. Irgendiwie isches eim vorko als hätt me scho noch dene paar Stund tuusigi vo Fründe gfunde, will alli total offe, nätt, hilfsbereit und sozial sin.
Ich teil s Zimmer mit dr Lotte, die einzige vo unserem Gang ("Klostergang") wo scho sit 4 Mönet do isch. Si isch e Dänin usem Bilderbuech und schnurt die ganz Zit, was für mi natürlig vo Vorteil isch. Denn het sis genetisch rigendwie nit im Griff ernscht zluege, lacht also immer.

Obwohls super lauft und ich mi wohl fühl isches scho hart nit wirklig an de Konversatione könne teilznäh. Eigentlig bini joe offene Mensch und mit anderne offene Mensche unterhalt i mi immer gärn, abr do bini immer zwunge so kli e Passiv-Rolle z übernäh. Aber scho nur das isch nit schlächt, i ha glaub no nie in de ganze Summerferie so vil Dänisch ghört, wie in dene zwei Täg! Ich verstohs vo Minute zu Minute besser (usser d Witz, lueg immer bitz ghüslet dri, wenn plötzlig alli mien lache), ich verstand sogar die eint Norwegerin!
Ich dänk mol das kunnt guet, ab übermorn hani denn endlich Unterricht und mit Sprochschuel und dene Lüt und Zuelose und Schwätze-Probiere wirdi ine paar Monet sicher mehr als nur passive Zuehörer bi de Gspröch si (*zuversichtlichbin*)

Jo und do isch wirklig volls Programm. Also es isch nit sone sturs Programm, wo eim Freiheite klauft, im Gegeteil. Es isch meischtens e gmüetlichs Beisammensein und macht Spass (und das seit eini wo gaaaar nit gärn Programm het) hüt Obe zum Bispil hän e paar Lehrer e Gegestand mitbrocht und verzellt, worum ihne die Sache öbbis bedüte und mir sin gmüetlich in de Sessel gsässe und hän Kaffi, Tee odr Kakao trunke (es het do e super Kaffimaschine mit x-Funktione und es schmeckt sau guet und isch gratis) und nochher simmer gmeinsam in "Spisesal" und hän öbbe 5 Lieder gsunge. Überhaupt wird do die ganz Zit gsunge, ich find das super, vor allem will alli mitmache, in dr Schwiz würd das irgendwie nit go (isch halt au nit Tradition).

Es isch au super, dasi do gratis Wireless-Internet ha, s dumme isch nur, dass die do keini gärdeti Steckdose hän und mi Stecker vom Jamie (mi Laptop für die wos nit wüsse) gärdet isch. I bi hüt im "Kontor" go froge öb si e Adapter hän mit drei Löcher, die schilendi Madame wo dört schafft het gseit si frogi mol noch und i sölli morn nomol ko. Ansunschte wäri froh, wenn mir öbber ein könnt schicke (zur Erinnerung zwei Stäckli zum ihnestecke und drei Löcher für mi Stecker).

Jo und ansunschte hämmer hüt no Gangföteli (wie e Klasseföteli, do isch me ebe noch Gäng ufteilt) gmacht und Zweierföteli (ich zäme mitem Amine, e Marokkaner, wo scho sit 10 Johr in Dänemark wohnt und mir die ganz Zit Muet macht, dasi das mit dr Sproch scho wird ahne kriege, sehr lieb :D ). Hehe und denn hämmer no Namensschildli für d Türe baschtlet, au sehr gmüetlich gsi.
Ajo und scho am zweite Tag ha ich "Køkkenvagt" also Kuchidienscht ka, zäme mit dr Lotte und dr Karina (eini us Peru wo e Dänische Verlobte het und will Dänisch lerne). Bi also ganz schön flissig.

So, meh schribi nüm, bi nämlig völlig "træt" vo dem intensive Tag.

Hugs from Annika i Danmark *muaha*

Bilder: (ka me si gseh?)