So, jetz hämmer mol e dreitägigs Wuchenend ka, wo kei Programm gsi isch. Isch no guet, so kunnt me mol zu all dene Sache wome eigentlig sött erledige. Es sin sehr vil hei gange, durum isch au nit wahnsinnig vil los gsi do. Nur am Fritig z'Obe hämmer, wie könnts au andersch si, e unoffizielli Party ka. Isch sehr luschtig gsi, es sin au no e paar Ehemoligi usem letschte Kurs ko. E typischi dänischi Party, mit vil vil, sehr vil Bier. S dumme dra isch gsi, dass me do scho sehr früeh afoht feschte (am 8i hämmer agfange!!) und durum am 11i scho alli entweder müed odr hackedicht gsi sin. Ich bi durum au scho am viertel vor 12i ins Bett gange und ha no "Alias" gluegt, wieni das immer z'NAcht gmacht ha an dem Wuchenend (mueses ebe usnütze, jetz wo dLotte nit do isch, denn muesi kei Rücksicht nä, wenn si will schlofe odr so).

Am nögschte Tag bini denn mit dr Elfa, Unnur (Island) und dr Siri (Norwege) uf Kopehage gange, bitz go shoppe. Mir häns unglaublich luschtig gha, vor allem will ich und d Unnur d Siri eifach nie verstande hän wenn si öbbis gseit het. Erschtens das komische norwegisch und zweitens näslet si zimlig. Mir hän uns denn ame nur no so agluegt und uns hets fascht verdätscht. Odr au sunscht, d Siri stellt immer so dummi, schwierigi odr unerwarteti Froge. Plötzlich het si so usem nüt usegfrogt, wer Präsident vo Islan sig, odr öb d Schwiz e umweltfründlichs Land sig odr weles unsere Liebilingskontinent isch usw. Isch sehr luschtig gsi. S Tolle dra isch gsi, dass mir 3 verschideni Sproche gredet hen, ich und dUnnur dänisch, d Elfa schwedisch und d Siri ebe norwegisch und mir hän uns eigentlig immer verstande (D Elfa het denn ebe ame übsersetzt, wenn d Siri widr öbbis komisch gseit het). Mir hen so guet wie kei Englisch brucht, isch ächt super gsi!!

Am Sunntig hani denn endlig mol d Wösch gmacht (ha eifach mol irgendwelchi Knöpf druckt bi dere komische Wäschmaschine, abr es isch guet useko ;) ), bi no bitz in d Turnhalle go trainiere (e ganzi Stund lang, has ächt nötig, miessti mind. eimol in dr Wuche mache, susch loht mini Kondition extrem noch) ha Husufgobe gmacht fürs Dänisch. Am 5i hän mi denn dr Per und d Constanze abgholt, das sin Fründe vo uns, wo in dr Nöchi wohne. Denn hani bi ihne zerscht mol Tee trunke, denn hämmer gesse und denn hets no Kaffi gä. Isch e unglaublich gmüetliche Obe gsi. D Louise, dr Constanze ihri Tochter isch denn au no ko. S Tolle isch au gsi, dasi mi jetz ändlig mol dänisch mit ihne unterhalte ha (also jo mehr odr weniger, ha denn scho ame au dütsch gredet).
Isch no härzig gsi, si hän mi übere Philipp usgfrogt ka und woni denn gseit ha, er kämi högschtworschinlich im Summer, het d Constanze gfunde, si freui sich ihn kennezlerne (gäll du ;) ) und denn irgendwenn wo d Constanze mit ihrer Familie telefoniert het, seit dr Per so: "Also gäll, du kasch gern dim Fründ alüte..." hamer das natürlig nit zweimol sage lo, denn vo dr Højskole us z telefoniere isch nit so dr Hit (gäll Mami).

Si hän mi denn so um die 9i widr hei gfahre und grad no dr Constanze ihres Velo mitgno. I gang ebe hüt mitem Per no ufs Folkeregister und uf d Bank und do d Constanze s Auto brucht, gömmer mit de Velos (so begeischteret drvo bini nit, denn es isch saumässig kalt do!)


Fredag-Party


es isch au mächtig tanzt worde ;)


Hanne-Mette og Asbjørn


Unnur und ich


in Kopehage: Unnur, ich, Siri


ufem Heiwäg vo Kophegage: Ich+Siri, Elfa+Unnur