So am Wuchenend isch Aktivitäts-wuchenend gsi. S Thema: "15 Minutes of Fame". Am Fritig zobe hämmer als Istig e kleins Turnier gmacht...Naja dr Anders und ich hän nur 9 Pünkt ka im Ganze, im Tischtennis hämmer kläglich verseit, Döggele hämme rnur 6 zu 4 gwunne und Trivial Pursuit hämmer 3 zu 2 gwunne ;) Isch abr sehr luschtig gsi.

Am Samschtig Morge hämmer denn in de Gangruppe e Lied beko zu dem me e Playback-Show het miesse istudiere. Mir hän "Like a Virgin ka". Dr Asbjørn het Madonna gspilt, mir hänen ine rosa Kleidli gsteckt. Denn hämmer dr Mitko als coole Keyboarder gno, D Lotte als Drummerin und d Hanne-Mette isch Bassischtin gsi. Dr Rescht het crazy Background Sängerinne gmimt. Ich zerscht au, doch bim zweite Refrain hani mi wiss-rot Blüemlete Koschtüm-Badmantel abzoge und hane Reel ume Asbjørn-Madonna in unserem blaue Show-Kleid tanzt und drmit zobe alli vom Hocker grisse :D
Brocht hets leider nüt, mir sin nur 4te worde.

Am Nomitag hämmer denn Wettbewerb ka, do het me verschideni Poschte in dr Gruppe miesse löse, zersch e Menschepyramide baue (do hämmer verseit), denn e Gang-Lied istudiere (naaaaja), denn Serviette-Falte für zobe fürs ässe (die Disziplin hämmer gwunne), e Filmquiz (do simmer au nit schlecht gsi, nit z letscht dank mir undem Mitko) und denn no Sternbilder errote (do simmer so mittelmässig gsi). Naja alles in allem hämmer denn dritte Platz gmacht, Folkemøde het gwunne und dörfe dr Wanderpokal (e singende Plüsch-Papagei) in Empfang nä...Abr es git jo no vil so Ganggruppe-Wettbewerb, s nögscht mol machemers denn besser ;)

Jo und denn ebe zobe: D Tisch sin total schön deckt gsi, mit unserne Serviette undeme sehr feine Ässe (sone Brote, brötleti Härdöpfel undere super Sosse). Denn nochher hets wie gseit die verschidene Darbietige ka, und me isch ame usem Lache nüm useko...worschins wärde bald mol d Föteli online si.
Und mis Tanze isch brutal guet ako, ha vo zimlig allne e Rückmäldig überko, ha alli ganz schön beidruckt :D au wenns worschinlig katastrophal gsi isch (Seitenblick zu Annie).

Am Sunntig isch denn fertig gsi (Ajo am Samschtig und Sunntig hets jewils e Brunch gä, so richtig toll, mit Pfannkueche, Speck, Rüehrei, Müesli, Yoghurt, Frücht, selberbackenem Brot usw.).
Denn simmer alli nur no umegläge, hän gshclofe, gläse, sin go dusche odr hän Film gluegt. Am Obe nochem Nachtesse bini no mit e paarne ins Kino in Hillerød go "I am Legend" luege...wääääääk ha ich Schiss ka (bi abr nit die Einzig gsi).

Das wärs für hüt.

MVH
Annika

Bilder:


Mir bim Singe vo unserem Ganglied


Folkemøde zu "Paradise of City" (Anette, Nete)


Marielyst zu "Lækker" (Uffe, Ewelina)


Skåne zu "I Shot the Sherriff Down" (Elisabeth, Eline, Mette, Louise, Siri)


Nordisk Gang zu "Barbie Girl" (Ulrik, Mikkel, Lise, Tine)


Klostergang zu "Like a Virgin" (Signe, Asbjørn, Maria)


Klostergang zu "Like a Virgin" (Johanne, ich (nochdem ich mi Uftritt ka ha ;) ))